Ethet TikTok America më në fund pushojnë njëherë e mirë me marrveshjen më të fundit e cila e sheh Microsoft jashtë saj.

Konfirmimin e dha Sekretari i Thesarit Steven Mnuchin i cili tha se marrveshja do t'i prezantohet Presidentit Trump gjatë kësaj jave. TikTok do të vazhdojë të operojë në USA nëpërmjet Oracle e cila në fakt nuk po e blen biznesin por thjesht po bart shërbimet e saj në republikë dhe në këmbim do të marrë një qera për përdorimin e serverave. 1400 punonjësit e TikTok USA dhe dhjetra miliona përdorues mund të marrin frymë të qetë.

Presioni i Trump ka rezultuar i pamjaftueshëm teksa qeveria Kineze ka deklaruar vazhdimisht se nuk do të lejojë që t'i zhvasin bizneset në këtë mënyrë. Në këmbim të kësaj Oracle është thjesht "një partner i besuar" nga Shtëpia e Bardhë, i cili do të ofrojë serverat e vetë dhe do të monitorojë gjithçka qarkullon në të.

"Ne do të kishim bërë ndryshime të ndjeshme për të siguruar se shërbimi do të arrinte standartet më të larta të sigurisë, privatsisë, kujdesit online dhe luftën kundër keqinformimit" ka thënë Microsoft.

Duke nënvijëzuar pikërisht fushat ku ngrihej shqetësimi i supozuar i qeverisë Amerikane. Në një marrveshje të tillë ku Oracle thjesht do të ketë serverat që TikTok USA do të përdorë asgjë nuk ndryshon, përderisa kompania Amerikane nuk shkruan asnjë kod e as nuk kontrollon asgjë. Në këtë mënyrë çensura, propaganda dhe spiunimi i pretenduar Kinez mund të vazhdojë të ekzistojë ende.

Kthehemi tek termi "partner i besuar". Ky term i atribohet Oracle, CEO dhe bashkë themeluesi i të cilës është Larry Ellison, një mbështetës i zjarrtë i Trump. Gjatë një eventi për mbledhje fondesh për presidentin në Palm Springs në shkurt ai ka thënë; "E mbështes atë dhe dua që ai të dalë mirë."

Pra në këtë rast ngrihen dyshime nëse shqetësimet e Presidentit kanë qenë legjitime. A ka qenë ai vërtetë në merak për qytetarët e vetë apo për rrethin e tij të mbështetësve? Tek e fundit TikTok nuk arriti të shkëputej nga ByteDance Kinez ekonomikisht nuk fitoi republika por miqtë e Trump.