Instagram lajmëroi ditën e mërkurë se do të shtojë dy modalitete të reja që do të ndryshojnë mënyrën se si feed-i funksionon, duke rikthyer dhe renditjen kronologjike të postimeve. Dy modalitetet e reja do të quhen “Following” dhe “Favorites”, të cilat janë të dizenjuara për t’i dhënë më tepër kontroll përdoruesve mbi postimet që shfaqen në feed.
Nëse navigoni në kategorinë Following “ju do të shikoni postimet më të fundit nga adresat që ndiqni sipas rradhës që ato janë postuar” shkruan Instagram. Nga ana tjetër nëse vendosni të navigoni në “Favorites”, ju do të shikoni vetëm postimet nga adresat tuaja të preferuara (deri në 50 të tilla), që duhet t’i përzgjidhni.
Zëdhënësja e Instagram, Seine Kim tregoi për The Verge në një email se lista Favorites është private dhe askush nga ndjekësit e tu nuk mund ta shohë atë. Megjithatë, dhe pse postimet u rikthyen në renditjen kronologjike, ka dhe një anë negative. Drejtuesi i Instagram, Adam Mosseri shkruan: “Me kalimin e kohës ne do të shtojmë më tepër rekomandime në feed-in tuaj bazuar në interesat që keni.”
Këto shërbime kanë nisur të zhvillohen shumë kohë më parë. Adam Mosseri ka folur rreth tyre disa herë gjatë vitit të kaluar, dhe disa përdorues kishin fatin ta testonin këtë shërbim.
Për të ndërruar kategorinë e navigimit, mjafton të klikoni në logon e Instagram lart në këndin e majtë dhe të zgjidhni midis tyre.
