Instagram po teston një buton të ri “dislike”, për të cilin kompania ka sinjalizuar se është një mënyrë që përdoruesit të votojnë në mënyrë efektive për të vlerësuar një koment të pakëndshëm ose të parëndësishëm.
Ky buton do të jetë i pranishëm vetëm për komentet, dhe jo vetë përmbajtjen aktuale. Platforma po e teston këtë me postimet e Reels dhe Feed. Shërbimi nuk do të tregojë një numër mospëlqimesh, megjithëse kreu i Instagram, Adam Mosseri thotë se mospëlqimet përfundimisht do të kontribuojnë në renditjen e komenteve.
Me fjalë të tjera, kjo veçori i ngjan më së shumti butonit doënvote në Reddit. “Kjo u jep njerëzve një mënyrë private për të sinjalizuar se nuk ndihen mirë për atë koment të veçantë,” shkroi Mosseri në Threads. “Shpresojmë se kjo mund të ndihmojë që komentet të bëhen më miqësore në Instagram.“
Një zëdhënës i Meta tha se qëllimi kryesor i butonit të mospëlqimit është të përmirësojë cilësinë e seksionit të komenteve, duke i bërë jehonë postimit të Mosserit. Ky është vetëm një test për momentin, kështu që butoni është i disponueshëm vetëm për një “grup shumë të vogël njerëzish“.
Gjatë kohëve të fundit Instagram ka qenë shumë i angazhuar. Përfaqësuesit e platformës njoftuan se po punonte në një aplikacion për modifikimin e videove që duket shumë i ngjashëm me aplikacionin e CapCut. Platforma madje zgjeroi gjatësinë e Reels në tre minuta, gjë që u pa si një tjetër imitues i TikTok.
