Raportimet më të fundit tregojnë se Google po teston një produkt të ri që do t’i lejojë përdoruesit të luajnë lojra në YouTube.
Ky produkt quhet “Playables” dhe bën të mundur që përdoruesit të luajnë lojra menjëherë përmes aplikacionit të YouTube në Android apo iOS si dhe në web për desktop. Gjatë kohëve të fundit Google ftoi të gjithë punonjësit që të testonin këtë shërbim, dhe njëra nga lojrat e përfshira quhet Stack Bounce, tepër e ngjashme me Brick Breaker Arcade në Android.
“Video-lojrat kanë qenë në fokusin e YouTube prej një kohe të gjatë.” tha një zëdhënës i YouTUbe në një deklaratë. “Ne gjithmonë kemi eksperimentuar me shërbime të reja por nuk kemi asnjë deklaratë zyrtare për momentin.”
Ky raportim vjen në një kohë tepër interesante për Google, e cila po përpiqet sërisht të integrohet në botën e video-lojrave. Tentativa e mëparshme e Google, Stadia, e cila u lançua në vitin 2019, nuk ishte aq e suksesshme saç u mendua, prandaj kompania e eleminoi këtë shërbim në 18 janar të këtij viti.
Madje drejtuesi i Stadia, Phil Harrison, ishte personi i cili i tregoi Google se sheh një mundësi që teknologjia e Stadia të implementohet në seksione të tjera të kompanisë, duke përfshirë këtu dhe YouTube.
