Në Browse tab të Apple Music përdoruesit kanë filluar të paralajmërohen se duhet “të përgatiten” pasi “muzika është gati të ndryshojë njëherë e mirë”. Klikimi mbi foto zbulon një video të animuar ku shfaqet thjeshtë logo e aplikacionit duke u rrotulluar.
Të gjithë këto “ngacmime” nga Apple besohet se i referohen shërbimit që do të vijë së shpejti, lossless dhe high-res music streaming në Apple Music. Raportimet e para erdhën nga MacRumors, të cilët vunë re disa kode “Lossless” dhe “Hi Res Lossles” në iOS 14.6 beta dhe Apple Music për Android beta. Në aplikacionin për Android mësohet se niveli Lossless do të suportojë music streaming në 24-bit/48Hz (kualitet pak më i mirë se CD), ndërkohë që niveli Hi-res do të luajë muzikë në 24-bit/192kHz.
— MacRumors.com (@MacRumors) May 16, 2021
Gjithashtu niveli Hi-res do të kërkojë më tepër memorie dhe internet për t’u luajtur në krahasim me nivelin aktual. Normalisht një këngë 3 minutëshe në Apple Music konsumon 6 MB internet, gjë që në nivelin lossless mund të shkojë në 36 MB dhe 145 MB në nivelin Hi-res lossless.
Përfitimi do të jetë sigurisht cilësia superiore e audios. Për momentin ky shërbim ofrohet në Tidal, Amazon Music dhe Deezer. Spotify ka prezantuar gjithashtu planet e saj për një kategori HiFi që mund të vijë më vonë gjatë këtij viti.
