Javën e kaluar, Google publikoi në heshtje një aplikacion të ri që u mundëson përdoruesve të përdorin modele të ndryshme të inteligjencës artificiale të disponueshme në platformën Hugging Face lokalisht në telefonin e tyre.
I quajtur Google AI Edge Gallery, aplikacioni është aktualisht i disponueshëm për Android dhe së shpejti do të dalë edhe për iOS. Ai u lejon përdoruesve të kërkojnë, shkarkojnë dhe ekzekutojnë modele të AI që mund të gjenerojnë imazhe, t’u përgjigjen pyetjeve, të shkruajnë ose modifikojnë kod dhe më shumë — të gjitha këto offline, pa nevojë për lidhje interneti, duke përdorur fuqinë përpunuese të telefonit.
Ndryshe nga modelet që ekzekutohen në cloud (qendra të largëta të të dhënave), modelet që funksionojnë në pajisje lokale janë më private dhe të disponueshme edhe pa lidhje Wi-Fi ose rrjet celular. Kjo është veçanërisht e vlefshme për përdoruesit që shqetësohen për privatësinë e të dhënave të tyre.
Google e përshkruan këtë si një version eksperimental Alpha, i disponueshëm për shkarkim nga GitHub përmes udhëzimeve zyrtare. Ndërfaqja kryesore e aplikacionit përfshin shkurtesa për funksione të ndryshme si “Ask Image” dhe “AI Chat”. Çdo funksion hap një listë modelesh të përshtatshme për atë detyrë, përfshirë edhe modelin e Google Gemma 3n.
Aplikacioni përfshin gjithashtu një seksion të quajtur “Prompt Lab”, që përdoret për detyra të shkurtra si përmbledhje ose rishkrim teksti. Ky seksion ofron shabllone dhe konfigurime për të kontrolluar sjelljen e modeleve.
Performanca mund të ndryshojë në varësi të pajisjes dhe madhësisë së modelit. Google fton komunitetin e zhvilluesve të japë feedback. Aplikacioni është nën licencën Apache 2.0, duke lejuar përdorimin e tij pa kufizime, edhe për qëllime komerciale.
