Një raport i ri paralajmëron se aplikacionet për ndjekjen e ciklit menstrual mund të rrezikojnë privatësinë dhe sigurinë e përdorueseve, pasi të dhënat personale shpesh shiten drejt kompanive të treta. Aplikacionet janë bërë të zakonshme për shkak të mungesës së informacionit mbi shëndetin menstrual dhe stigmës sociale që e rrethon këtë temë. Një studim i vitit 2024 vlerëson se tre aplikacionet më të njohura që ofrojnë këto shërbime janë shkarkuar mbi 250 milionë herë globalisht.
Sipas raportit të Minderoo Centre for Technology and Democracy (MCTD) në Universitetin e Cambridge, përdorueset nuk e konsiderojnë këtë informacion si intim apo komercialisht të vlefshëm, çka i lë ato të pambrojtura ndaj abuzimeve. Të dhënat iu shiten reklamuesve dhe kompanive të teknologjisë, ndërsa “femtech” (teknologji për shëndetin e grave) është kthyer në një treg miliarda dollarësh. Aplikacionet mund të zbulojnë preferenca politike, probleme shëndetësore apo zgjedhje riprodhuese.
Raporti ngre gjithashtu shqetësime për pasigurinë e të dhënave, me raste të përdorimit të tyre për ndëshkime ligjore, zbulimin e dhunës në marrëdhënie, diskriminim në sigurime shëndetësore apo vendet e punës. Për më tepër, saktësia e aplikacioneve është e diskutueshme, pasi shumë nuk arrijnë të parashikojnë saktë ciklet ose ovulimin, dhe përdorin të dhënat më shumë për qëllime tregtare sesa për përmirësimin e shërbimit.
Raporti kërkon rregullim më të rreptë të të dhënave menstruale si informacion shëndetësor i ndjeshëm, transparencë në mënyrën si përdoren të dhënat, aplikacione të besueshme nga institucione publike, dhe ndërgjegjësim më të madh në shkolla dhe organizata.
