Me rritjen e jashtëzakonshme të popullaritetit të F1, veçanërisht në SHBA falë serialit të Netflix “Drive to Survive”, sporti është shndërruar në një magnet për kompanitë e teknologjisë që kërkojnë dukshmëri dhe avantazh konkurrues përmes të dhënave dhe inteligjencës artificiale.
Zgjedhja e IBM ishte e natyrshme, të krijonte një partneritet me Scuderia Ferrari HP, skuadra më e suksesshme në historinë e F1. Por thelbi i marrëveshjes shkon përtej sponsorimit. Ashtu si rivalët e saj, Ferrari po kërkon zgjidhje teknologjike të avancuara për të shfrytëzuar sasinë masive të të dhënave që gjenerohen gjatë çdo gare dhe për ta kthyer këtë informacion në përvoja më tërheqëse për tifozët.
Fokusi kryesor i bashkëpunimit IBM–Ferrari është angazhimi i fansave, përmes një ristrukturimi të plotë të aplikacionit zyrtar të tifozëve të Ferrarit. Me ndihmën e AI, të dhënat nga pista përkthehen në përmbledhje garash të shkruara automatikisht, histori “behind-the-scenes”, lojëra interaktive, parashikime dhe madje edhe një asistent virtual që i përgjigjet pyetjeve të fansave. Qëllimi, sipas Ferrarit, nuk është vetëm të arrijë tifozët, por t’i bëjë ata të ndihen të njohur dhe të përfshirë personalisht.
Ndryshe nga shumë skuadra të tjera që mbështeten te rrjetet sociale ose platformat zyrtare të F1, Ferrari ka zgjedhur një strategji me aplikacion të dedikuar, duke sinjalizuar se sporti po fillon të kapitalizojë seriozisht bazën e tij globale të fansave. Rezultatet janë të prekshme, pasi angazhimi në aplikacion është rritur ndjeshëm, me një rritje prej 62% gjatë fundjavave të garave.
Me një audiencë gjithnjë e më të larmishme, përfshirë shumë gra dhe fansa të Gen Z, vizioni afatgjatë i Ferrarit dhe IBM është personalizimi maksimal. Falë këtij partneriteti do të ofrohet një eksperiencë që i bën tifozët të ndihen sikur është ndërtuar posaçërisht për ta, pavarësisht nëse e ndjekin skuadrën prej dekadash apo prej pak ditësh.
