Qeveritë dhe institucione të ndryshme në mbarë botën kanë nisur të ndalojnë përdorimin e TikTok në smartphone-t e përdorur nga zyrtarët e lartë shtetëror për shkak të shqetësimeve të spiunimit nga ky aplikacion.
Pavarësisht insistimit të përfaqësuesve të TikTok që tregojnë se aplikacioni nuk shpërndan asnjë të dhënë në platformë me qeverinë kineze, Franca është shteti më i ri i cili ka vendosur të ndalojë përdorimin e tij në smartphone-t e punonjësve. Në të njejtën kohë ky shtet është i pari që ka marrë një vendim të ngjashëm dhe për aplikacione të tjera argëtuese si Netflix, Instagram, Candy Crush dhe Twitter.
Ky ndalim nga agjencia e sigurisë kibernetike në Francë pritet të prekë mbi 2.5 milionë punonjës. “Aplikacionet argëtuese mund të përbëjnë një rrezik për sigurinë e të dhënave që gjenden në smartphone-t e përdorur nga nëpunësit e shtetit.” tregon agjencia e sigurisë kibernetike.
Pra Franca, ndryshe nga vendet e tjera perëndimore, po trajton teknologjinë amerikane dhe atë kineze në të njetën mënyrë. Kjo nuk është hera e parë që ka patur tensione midis Francës dhe SHBA për sa i përket teknologjisë.
Në 2019, Franca aprovoi një taksë për shërbimet dixhitale, pavarësisht kërcënimeve të tërheqjes së këtyre shërbimeve nga palët amerikane si Google dhe Facebook. Gjithashtu që nga viti 2018, Franca ka kundërshtuar US Cloud Act, që i mundëson autoriteteve ligjzbatuese amerikane të marrin të dhënat e regjistruara në shërbimet cloud dhe jashtë SHBA.
