Një studim i ri ka arritur në përfundimin se çdo orë që fëmijët shpenzojnë duke luajtur video-lojra apo duke parë video në YouTube rrit rrezikun për zhvillimin e çrregullimit obsesiv-komplusiv me 13%. Prej kohësh është bërë e ditur se shpenzimi i kohës së gjatë para ekranit të kompjuterit shkakton probleme me ushqyerjen dhe mendore.
Megjithatë, ndryshe nga studimet e tjera, në këtë studim tregohet se nuk është gjetur asnjë lidhje midis shikimit të filmave dhe luajtjes së lojrave në smartphone me çrregullimin obsesiv-kompulsiv. Studiuesit ia vunë fajin algoritmit të YouTube dhe përmbajtjeve adiktive të video-lojrave në shprehjen e këtyre ndjenjave kompulsive tek të rinjtë.
Shkencëtarët në University of California morën në studim 9,204 fëmijë në moshën 9-10 vjeçare. Në fillim të studimit, u vu re sa kohë ata shpenzonin para ekranit të kompjuterit. Dy vite më vonë, prindërit e tyre u thirrën dhe u pyetën në lidhje me zhvillimin e çrregullimeve tek fëmijët e tyre.
Studiuesit zbuluan se këta fëmijë shpenzonin 3 orë e 54 minuta duke shikuar ekrane çdo ditë, duke përfshirë këtu dhe kohën e nevojitur për studim. Në fund u arrit konkluzoni se 405 fëmijë (4.4%) ishin diagnostikuar me çrregullimin obsesiv-kompulsiv.
Analizat treguan se fëmijët që shpenzonin më tepër kohë duke luajtur video-lojra kishin një rrezik më të madh për t’u diagnostikuar me këtë çrregullim.
