Komuniteti i shkencëtarëve të hapësirës mendojnë se ka ardhur koha që planeti Uran të studiohet me më tepër imtësi. Përmes një raportimi ato kanë bërë të ditur se dërgimi i një sonde ndërplanetare për të studiuar “gjigandin e akullt” duhet të jetë një çështje me prioritet të lartë përgjatë dekadës së ardhshme.
Specifikisht, shkencëtarët po komunikojnë me NASA për të hartuar misionin Uranus Orbiter and Probe. Përmes këtij misioni synohet të dërgohet një anije kozmike që do të orbitojë Uranin, së bashku me një sondë e cila do të futet në atmosferën e planetit. Shkencëtarët përllogarisin se lançimi i këtij misioni mund të kryhet gjatë viteve të para të dekadës së ardhshme nëse inxhinierët nisin të punojnë për këtë projekt duke filluar nga viti i ardhshëm.
Nëse ky mision funksionon, ai do të sigurojë informacione më të detajuara rreth kësaj bote ende të paeksploruar. Anija kozmike e vetme që iu afrua Uranit ishte Voyager 2 i NASA në 1986, e cila ishte rreth 81,600 km larg reve të larta. Kjo anije kozmike bëri zbulime të rëndësishme si disa hëna të reja dhe unazat e planetit.
Një anije kozmike orbituese dhe një sondë mund të sjellin akoma më tepër informacione rreth këtij planeti, duke na treguar ekzaktësisht përbërjen e tij. Shkencëtarët besojnë se Urani përbëhet kryesisht nga një kombinim i shkëmbinjve, akujve, hidrogjenit dhe heliumit, mirëpo një gjë e tillë nuk është konfirmuar.
