Ligjvënësit amerikanë ditën e enjte “e mbytën në pyetje” CEO-n e TikTok në lidhje me influencën e qeverisë kineze në platformë si dhe në lidhje me dëmtimin e shëndetit mendor të fëmijëve për shkak të fuqisë që ky aplikacion ka mbi qytetarët amerikanë.
Dëshmia e CEO-s Shou Zi Chew para Kongresit duket se nuk zbuti aspak shqetësimet e SHBA në lidhje me kompaninë mëmë të TikTok, ByteDance, dhe lidhjeve që ajo ka me qeverinë kineze, duke nxitur akoma më tepër dëshirën e ligjvënësve për të dënuar përdorimin e platformës në mbarë kombin.
Përgjatë 5 orëve të dëshmisë, Chew mohoi vazhdimisht akuzat se aplikacioni shpërndan të dhënat e përdoruesve ose se aplikacioni ka lidhje me Partinë Komuniste Kineze dhe tregoi se platforma po bën gjithçka që është e mundur për të garantuar sigurinë e 150 milionë përdoruesve amerikanë.
Chew tregoi se prej 2 vitesh kompania ka punuar për krijimin e një “firewall” për të mbrojtur të dhënat e përdoruesve nga SHBA. “Të dhënat amerikane janë të ruajtura në Amerikë, nga një kompani amerikane dhe e mbikëqyrur nga personeli amerikan.“ shtoi CEO i TikTok.
Të tjera akuza të ngritura ishin në lidhje me promovimin e përmbajtjeve që inkurajojnë çrregullimet ushimore tek fëmijët, shitjen e drogërave ilegale apo shfrytëzimin seksual. “TikTok mund të jetë dizenjuar për të minimizuar dëmtimin e fëmijëve, megjithatë një vendim u morr për të krijuar një varësi agresive të fëmijëve për më tepër përfitime.” tha përfaqësuesja Kathy Castor.
Chew u përgjigj duke thënë se shumë nga pyetjet e bëra janë komplekse dhe nuk janë të pranishme vetëm në TikTok. Kompania tregon se ka shpenzuar më tepër se $1.5 miliardë për sigurinë e të dhënave nën “Texas Project”, ku janë të punësuar mbi 1,500 persona, ndërkohë që të dhënat e përdoruesve të TikTok në SHBA ruhen nga Oracle Corp.
“Ne nuk promovojmë apo fshijmë përmbajtje me kërkesën e qeverisë kineze. Ne zotohemi para këtij Kongresi dhe para përdoruesve se nuk do të lejojmë në platformë manipulimin nga asnjë qeveri.” tha CEO Chew.
TikTok tregoi gjatë javës së kaluar se administrata e Biden i kishte kërkuar pronarëve nga kina që të shisnin aksionet e tyre ose në të kundërt do të përballeshin me një dënim. Kur u pyet në lidhje me këtë paralajmërim, Chew tregoi se problemi nuk qëndron në pronësinë e aplikacionit, por ky problem mund të zgjidhet fare lehtë duke lëvizur të dhënat në qendrat e ruajtjes në SHBA.
Përfaqësuesi Gus Bilirakis tregoi para kongresit një koleksion me video të publikuara në TikTok në të cilat promovohej dëmtimi i vetvetes si dhe vetëvrasja. “Teknologjia juaj po çon drejt vdekjes fëmijë të rinj. Ne duhet të shpëtojmë fëmijët tanë nga kompanitë e mëdha si ju, të cilat vazhdojnë t’I abuzojnë dhe t’i manipulojnë për përfitime vetjake.”
Chew tha se TikTok e merr shumë, shumë seriozisht problemin e vetëvrasjes në platformë.
