YouTube ka vendosur të pengojë sa më shumë të jetë e mundur eksperiencën në platformë të personave që përdorin ad blockers. Kompania ka konfirmuar tashmë se ka nisur “një eksperiment të vogël në të gjithë botën” që nxit përdoruesit me një ad blocker aktiv të lejojnë shfaqjen e reklamave në YouTube, në të kundërt duhet të provojnë YouTube Premium.
Kjo deklaratë vjen pasi disa përdorues të YouTube kanë raportuar se iu është shfaqur një lajmërim i ri që tregonte se luajtja e videos do të ndërprehej nëse YouTube zbulonte përdorimin e përsëritur të një ad blocker.
“Zbulimi i ad blocker nuk është një gjë e re, dhe publikues të ndryshëm në YouTube i bëjnë thirrje ndjekësve të tyre të çaktivizojnë ad blocker,” tha Oluwa Falodun, një zëdhënës i Google në një deklaratë. YouTube insiston që ju të çaktivizoni ad blocker nëpërmjet disa njoftimeve të njëpasnjëshme, para se të ndalojë luajtjen e videos.
“Ne po e marrim këtë situatë tepër seriozisht, dhe do të ndalojmë luajtjen e videos vetëm në rastet kur përdoruesit i injorojnë kërkesat e përsëritura nga ana e YouTube.” shtoi Falodun. ”Në rastet kur një përdorues mendon se është dënuar pa të drejtë dhe se nuk ka përdorur një ad blocker, ato mund të shpërndajnë feedback-un e tyre duke klikuar në njoftim.”
