Ndërsa Siri i Apple po sulmohet vazhdimisht për vështirësitë që has në përgjigjen e pyetjeve më të thjeshta, kompania po “shkund” lidershipin përgjegjës për veçoritë e AI të Apple për Siri.
Sipas Bloomberg, CEO i Apple, Tim Cook po vendos Mike Rockwell, zëvendësin aktual të Vision Product Group (ekipi që qëndron pas Vision Pro), për të kryesuar ekipin Siri. Raporti tregon se Cook ka “humbur besimin” te kreu aktual i AI, John Giannandrea, “për të ekzekutuar zhvillimin e produktit“. Si rezultat, Giannandrea nuk do të jetë më në krye të Sirit.
Rockwell, ndërkohë, do të raportojë te shefi i softuerit Craig Federighi, ndërsa ekipi i Vision Products Group tani do të drejtohet nga Paul Meade, i cili më parë drejtonte inxhinierinë e harduerit për Vision Pro.
Siri nuk ka qenë në gjendje të luftojë me sistemet moderne të AI, duke e detyruar Apple të integrojë shërbimet e palëve të treta AI, si ChatGPT, në softuerin e saj vetëm për të arritur zhvillimet e shpejta të AI dhe pritshmëritë e konsumatorëve. Në testet e fundit, përdoruesit e Siri vunë në dukje se Siri i fuqizuar nga Apple Intelligence nuk mund t’u përgjigjej saktë pyetjeve të thjeshta si “kush fitoi Super Bowl?“
Këtë muaj, Apple gjithashtu njoftoi se po vononte prezantimin e Siri-t më të “personalizuar” deri vitin e ardhshëm, pa një datë ekzakte.
