Në eventin Google I/O 2025, Google prezantoi Veo 3, një model i avancuar AI që krijon video 8-sekondëshe pas dhënies së komandave me tekst. Menjëherë pas prezantimit, artistë dhe kineastë publikuan video befasuese që u shpërndanë gjerësisht në rrjetet sociale — shumica pa e kuptuar se ishin gjeneruar nga inteligjenca artificiale.
Edhe pse ekzistojnë shërbime të tjera të ngjashme si Sora e OpenAI, Veo 3 bëri më shumë bujë për shkak të cilësisë ekstremisht të mirë, krijon tinguj realë, dialogë dhe personazhe të qëndrueshëm në disa skena, si dhe lejon kontroll të detajuar mbi këndet e kamerës dhe lëvizjen. Është i disponueshëm për përdoruesit me abonim përmes Google Gemini dhe platformës Flow për kineastët.
Një shembull viral është filmi i shkurtër “Influenders”, krijuar nga Yonatan Dor, themelues i studios The Dor Brothers. Filmi i krijuar tërësisht nga AI tregon reagimin e influencerëve ndaj një katastrofe misterioze dhe tregon fuqinë krijuese të Veo 3. Edhe pse këto klipe kanë ende shenja tipike të AI, ato po bëhen gjithnjë e më pak të dallueshme.
Por kjo teknologji sjell edhe rreziqe serioze. Ekspertët kanë paralajmëruar prej kohësh për rritjen e dezinformimit dhe deepfake-ve. Google thotë se çdo video e gjeneruar nga Veo 3 përmban vulën dixhitale SynthID për identifikim, por nuk dihet nëse përdoruesit do të dinë ose dëshirojnë të verifikojnë përmbajtjen.
Veo 3 sjell mundësi të jashtëzakonshme për krijuesit, por gjithashtu rrezik për manipulim të opinionit publik. Ndërsa kjo teknologji përhapet, vëmendja dhe mendimi kritik janë më të rëndësishëm se kurrë. Realiteti dhe AI po bashkohen — shpejt.
