Nëse 2020 nisi me pragun e një lufte botërore, ekzistencën e UFO dhe më pas një pandemi, duket se edhe 2021 po vjen me dozën e vetë të anomalive. Jeta po ecën më shpejtë dhe kjo në kuptimin jo figurativ të fjalës. Bota është duke u rrotulluar më shpejtë, aq sa shkencëtarët po konsiderojnë të heqin një sekondë.
Nëse nuk e dije rruzulli tokësor rrotullohet në boshtin e vetë në një mënyrë jo konstante, kjo nuk është hera e parë që kohës i ndryshojnë sekondat, në fakt që nga 1970 botës i janë shtuar 27 sekonda. Ama kjo është hera e parë që konsiderohet heqja e një sekonde, pasi rruzulli tokësor nuk është rrotulluar ndonjëherë kaq shpejt në 50 vjet.
Një ditë e plotë zgjat 86,400 sekonda, por që prej mesit të 2020 koha ekzakte ka qenë pak më poshtë asaj shifre. 19 korriku 2020 zgjati ekzaktësisht 1.4602 milisekonda më pak se 24 orë. Smartphoni në xhepin tënd nuk do e kuptojë diferencën, ai është shumë i pa-saktë për atë punë. Por në botë ekzistojnë disa orë atomike të cilat e reflektojnë ndryshimin.
Nga ana tjetër ende nuk është vendosur nëse do të hiqet sekondi shtesë apo jo, ky është vendim që kërkon diskutim internacional. Gjatë një interviste për The Telegraph, Peter Whibberly, një shkencëtar nga Laboratori Kombëtar i Fizikës së UK thotë se: “Është e vërtetë se toka po rrotullohet më shpejtë se kurrë ndonjëherë në 50 vjet. Heqja e një sekondi do të ishte e domosdoshme nëse bota do të vijojë të shtojë shpejtësinë. Por për këtë kërkohen edhe takime internacinale të cilat do të marrin kohën e vetë.”
