Tile, rivali i AirTag, sapo ka lançuar një pajisje të re që ju ndihmon të lokalizoni vendndodhjen e maces tuaj në rast se ajo është larguar nga shtëpia. Kjo pajise me emrin “Tile for Cats” është një version i modifikuar i Tile Sticker që është i pajisur me një qafore silikoni dhe që kushton $39,99.
Kompania premton se bateria e Tile for Cats do të zgjasë deri në 3 vite dhe mund të zëvndësohet shumë lehtësisht. Për sa i përket shtrirjes së sinjalit, pajisja do të funksionojë në të gjitha pajisjet Android dhe iOS në një diametër prej 76.2 metrash.
Kjo pajisje jo vetëm që do të ndihmojë “prindërit” e maceve të shikojnë vendndodhjen aktuale të maces së tyre, por mund të tregojë dhe në rastet kur kafshët shtëpiake po fshihen në një vend të errët. Njësoj sit ë gjithë pajisjet Tile, ky produkt ofron integrimin e asistentëve dixhitalë si Siri, Alexa apo Google Assistant.
Kjo është hera e parë që kompania lançon një produkt specifikisht për kafshët, duke përdorur një dizajn ekzistues dhe duke e përshtatur atë për kafshët shtëpiake. Në të vërtetë ju mund të përdorni dhe një AirTag, që është më pak i kushtueshëm, por do të duhet të gjeni dhe një qafore me vend specifik për të.
