Një mjet i inteligjencës artificiale mund të zbulojë çrregullimin e spektrit të autizmit me saktësi 100%, vetëm duke skanuar imazhet e syve të fëmijëve, sipas një studimi të ri. Nëse konfirmohet, ky do të ishte një zbulim i madh dhe tepër i rëndësishëm në shoqërinë tonë.
Por ekspertë të shumtë të autizmit thanë për se numri është joreal dhe rezultati ndoshta është ‘shumë i mirë për të qenë i vërtetë’. Autizmi prek rreth 1 në 36 fëmijë në SHBA, por shumë fëmijë mbeten të padiagnostikuar deri më vonë në fëmijëri, duke i privuar ata nga terapitë e mundshme. Nëse një zgjidhje teknologjike mund të ndihmojë në diagnostikimin e shpejtë të autizmit, mund të përfitojnë miliona familje.
Autizmi është një çrregullim që përfshin zhvillimin e alteruar të trurit dhe të nervit optik që lidh retinën me trurin. Pra, është e arsyeshme të mendosh që këto ndryshime të mund të reflektohen në sy. Dhjetra media shpërndanë lajmin rreth këtij mjeti AI, të zhvilluar nga një ekip studiuesish në Universitetin Yonsei në Seul.
Por ekspertët thonë se është shumë herët për t’u besuar këtyre gjetjeve dhe se hulumtimi ngre shumë çështje për diskutim- duke filluar me atë shifër të saktësisë 100%.
“Kjo është e qartë se ka diçka jonormale në këtë studim,” tha Fred Shic, një studiues i autizmit në Spitalin e Fëmijëve të Seattle dhe Universitetin e Uashingtonit. Shic studion teknikat e gjurmimit dhe imazhit të syve tek fëmijët autikë. “Nuk ka asnjë mënyrë që ky test të jetë më i saktë se mjekët,” tha ai. “Kjo besueshmëri nuk është 100 për qind, madje edhe në mesin e klinicistëve më të mirë në botë.”
Ekspertë të tjerë të autizmit ndajnë skepticizmin e Shicit. “Duket shumë mirë për të qenë e vërtetë”, tha dhe Cathy Lord, profesoreshë e shquar e psikiatrisë në Universitetin e Kalifornisë në Los Anxhelos.
