Idea se polet magnetike të Tokës mund të rrotullohen dhe të ndërrojnë pozicionin me njëra-tjetrën duket si pjesë e një filmi fantashkencë, mirëpo shumë shkencëtarë besojnë se një gjë e tillë mund të ndodhë papritur. Historikisht, polet magnetike të veriut dhe të jugut të Tokës janë rrotulluar çdo 200,000-300,000 vjet.
Megjithatë, rrotullimi i fundit i poleve magnetike ka ndodhur rreth 780,000 viteve më parë, dhe shumë shkencëtarë janë të shqetësuar se një gjë e tillë është e pashmangshme. Nëse një rrotullim i tillë do të ndodhë, disa ekspertë shpjegojnë se disa pjesë të Tokës do të bëhen “të pabanueshme” për shkak të mungesës së energjisë elektrike.
Për fat të mirë, një studim i ri tregon se një ngjarje e tillë gjatë viteve në vijim është shumë e pamundur. Studiuesit nga Lund University kanë grumbulluar të dhënat mbi fuqinë e fushës magnetike të Tokës për 9,000 vitet e fundit dhe nuk kanë vënë re asnjë ndryshim të rëndësishëm.
Toka ka një bërthamë të shkrirë e cila gjeneron një fushë magnetike me aftësi mbrojtëse kundër erërave shkatërruese diellore. Kjo fushë mbrojtëse zgjerohet me mijëra kilometra në hapësirë dhe efektet magnetike të saj ndikojnë gjithandej. Përgjatë 180 viteve të fundit, forca e fushës magnetike të Tokës është dobësuar me 10%.
Megjithatë ekziston një zonë misterioze në Atlantikun Jugor ku fusha magnetike po dobësohet me një shkallë më të shpejtë. Zona e quajtur South Atlantic Anomaly ka shkaktuar prishjen e disa satelitëve të ndryshëm për shkak të ekspozimit të lartë nga rrezet e diellit.
