Më shumë se 70 shkencëtarë të inteligjencës artificiale nga e gjithë bota i kanë dërguar një letër Presidentes së Komisionit Evropian, Ursula von der Leyen, duke i kërkuar të tërheqë një deklaratë të bërë në maj, ku ajo tha se inteligjenca artificiale pritet të arrijë arsyetimin njerëzor “vitin e ardhshëm”.
Shkencëtarët e akuzojnë Von der Leyen për përhapjen e një “deklarate të rrezikshme” të nxitur nga kompanitë teknologjike, që sipas tyre mund të çojë në politika të gabuara dhe humbje të fondeve publike. Në letrën e tyre, ata i kërkojnë Komisionit Europian të vlerësojë me kujdes pretendimet e marketingut të produkteve të AI dhe të bazohet në prova shkencore të paanshme përpara se të marrë vendime të rëndësishme politike.
Ndër nënshkruesit është edhe Dr. Kris Shrishak, studiues në Këshillin Irlandez për Liritë Civile (ICCL), i cili theksoi se drejtuesit e institucioneve të BE-së kanë një përgjegjësi ndaj qytetarëve për të mos nxitur iluzione rreth fuqisë së AI-së. Sipas tij, fryrja e këtij entuziazmi mund të bëjë që BE të mbështesë politika të dëmshme dhe të bëhet bashkëfajtore në pasojat negative të teknologjisë.
Në përgjigje, një zëdhënës i Komisionit Europian tha se institucioni nuk parashikon arritjen e një AI me aftësi njerëzore vitin e ardhshëm, por pranoi se progresi po ndodh më shpejt se parashikimet e viteve të kaluara. “Planifikimi përgjegjës,” shtoi ai, “nuk është të hamendësosh të ardhmen, por të përgatitesh për skenarë të ndryshëm.”
