Agjencia Hapësinore Evropiane ka nisur të diskutojë rreth një plani të ri i cili ka si qëllim krijimin e një ferme me panele diellore që do të qarkullojnë në orbitë.
Projekti Solaris mbështet idenë e grumbullimit të dritës së diellit në një zonë të gjërë në hapësirë, konvertimin e tyre në energji mikrovalësh (në mënyrë të ngjashme me valët elektromagnetike të frekuencës së lartë që gjenden në mikrovalën që ne e përdorim çdo ditë) dhe më pas transmetimin e tyre drejt Tokës.
Një numër i madh antenash në Tokë do të bëjë të mundur kapjen e këtyre valëve dhe energjia më pas do të konvertohet në elektricitet. Avantazhet e Space Based Solar Power janë shumë të mëdha pasi mikrovalët mund të tejkalojnë retë në atmosferën e Tokës dhe rrezet e diellit në hapësirë, gjithashtu gjenerimi i kësaj energji do të jetë i pandërprerë, jo vetëm gjatë ditës.
Sipas studimeve të kryera, një sistem i tillë mund të zhvillohet deri në vitin 2040 dhe të gjenerojë një përqindje të madhe të energjisë që njerëzit përdorin në ditët e sotme. Mirëpo kostoja e krijimit të këtij sistemi do të jetë shumë e madhe dhe mund të shkojë deri në €20 miliardë.
