CEO i OpenAI, Sam Altman, prezantoi para pak ditësh shërbimin më të ri të integruar në ChatGPT, gjenerimin e imazheve përmes inteligjencës artificiale. Ajo që Altman nuk dinte ishte se si një trend në rrjetet sociale do të shkrinte GPU-të e kompanisë nga përdorimi i tepërt i këtij shërbimi.
“Ndërsa është ‘super argëtuese të shohësh njerëzit që i duan imazhet’ në ChatGPT, GPU-të tona po shkrihen“, postoi Altman në rrjetin social X të enjten, duke shtuar se kompania do të kufizojë përkohësisht përdorimin e funksionit pasi punon për ta bërë atë më efikas.
Kompania prezantoi shërbimin e gjenerimit të imazheve “me cilësi të lartë” si një mënyrë për të prodhuar gjithçka, nga diagramet, infografikët, logot e deri tek kartat e biznesit. Funksioni mund të përdorë gjithashtu një imazh si pikënisje për artin, si p.sh. një pikturë me porosi të një kafshe shtëpiake ose editim i një fotografie profesionale.
Funksioni i gjenerimit të imazheve filloi të përhapet për përdoruesit e ChatGPT PLUS, Pro dhe Team të martën, si dhe përdoruesit e nivelit të lirë të chatbot-it kur përdorin modelin 4o të OpenAI. Përdoruesit e ChatGPT Enterprise dhe Edu do të kenë akses javën e ardhshme, tha kompania.
Megjithatë një trend i ri në rrjetet sociale ishte krijimi i imazheve përmes AI me një stil anime “Ghibli Style” që nga prezantimi i funksionit të martën. Altman, për shembull, ndryshoi fotografinë e tij të profilit X në një imazh të tijin të gjeneruar në “Ghibli Style”. Përdoruesit e nivelit falas të ChatGPT së shpejti do të jenë në gjendje të gjenerojnë 3 imazhe në ditë, shkroi Altman.
