Në datën 11 korrik, një qendër shpërndarje në Afrikën e Jugut u sulmua nga disa hajdutë të cilët vodhën dhe disa televizorë Samsung. Megjithatë, të gjithë TV e vjedhura janë tashmë të papërdorshëm pasi Samsung ka zbuluar se ato janë të pajisura me një teknologji që lejon bllokimin e shërbimeve nga distanca.
Fakti surprizues është se kjo gjë mund të bëhet në të gjithë TV e Samsung, pavarësisht vendit se ku janë shitur në të gjithë botën. Kompania pranoi ekzistencën e kësaj teknologjie përmes postimit më të ri në Samsung Newsroom ku detajon se si TV në Afrikën e Jugut u vodhën dhe u çaktivizuan.
Kjo teknologji është quajtur TV Block dhe është e “instaluar në të gjithë produktet Samsung”. Çdo herë që konfirmohet se një TV është vjedhur, Samsung regjistron numrin serial të TV dhe më pas pret deri sa ky TV të lidhet në internet. Në këtë pikë serveri i Samsung lidhet automatikisht, kontrollohet numri serial, dhe nëse ky TV është në listë “sistemi bllokues futet në punë, duke çaktivizuar të gjitha shërbimet e TV”.
Dhe pse Samsung po e reklamon TV Block si një teknologji pozitive, kjo gjë mund të duket disi shqetësuese për përdoruesit e TV nga kjo kompani, pasi tashmë ata kuptojnë se nuk kanë kontroll të plotë mbi pajisjen e tyre. Në rastin e hakerimit të kompanisë, një haker mund të vendosë që të bllokojë funksionet e të gjithë TV të lidhur në internet në mbarë botën.
E vetmja mënyrë për të mbojtur pajisjen tuaj nga ky bllokim është moslidhja e TV me internetin.
