CEO i OpenAI, Sam Altman, ka shprehur shqetësimin për privatësinë e përdoruesve që përdorin ChatGPT për mbështetje emocionale apo terapi. Gjatë një interviste në podkastin e Theo Von, This Past Weekend, Altman theksoi se mungon një kuadër ligjor për të mbrojtur bisedat me AI, siç ekziston për marrëdhëniet me mjekët, psikologët apo avokatët.
Shumë përdorues, veçanërisht të rinjtë, e përdorin ChatGPT si një psikolog apo trajner jete, duke ndarë informacione shumë personale. Por këto biseda nuk janë të mbrojtura ligjërisht dhe mund të përdoren në procese gjyqësore. Altman pranoi se OpenAI mund të detyrohet të dorëzojë këto biseda nëse i kërkohet nga gjykata, dhe e quajti këtë situatë problematike.
Kjo mungesë e privatësisë mund të pengojë përhapjen më të gjerë të AI, sidomos kur përdoruesit kuptojnë se sa të dhëna mbledh AI dhe si mund të përdoren ato në raste ligjore. Për shembull, në procesin gjyqësor mes OpenAI dhe The New York Times, një urdhër gjykate mund të kërkojë ruajtjen e bisedave të miliona përdoruesve globalisht — përveç klientëve enterprise. OpenAI po apelon këtë vendim, duke e quajtur “tejkalim kompetencash”.
Altman e lidhi këtë çështje edhe me debatet më të gjera për privatësinë digjitale, sidomos pas ndryshimeve në ligjet për të drejtat personale si aborti. Në fund, Altman tha se është krejtësisht e arsyeshme që përdoruesit të kërkojnë sqarime ligjore për privatësinë para se të përdorin gjerësisht ChatGPT.
