Në Pekin është hapur një dyqan i ri robotësh, Robot Mall, që shet gjithçka, duke nisur nga “shërbyesit mekanikë” e deri te një robot tepër të ngjashëm vizualisht me Albert Einstein. Më shumë se 100 lloje produktesh janë në shitje, duke e bërë atë një nga dyqanet e para në Kinë që ofron robotë humanoidë dhe për përdorim konsumator. Dyqani funksionon si një “koncesionar” makinash, duke ofruar jo vetëm shitje, por edhe pjesë këmbimi dhe shërbime mirëmbajtjeje.
Hapja e tij reflekton investimet e mëdha të Kinës në robotikë dhe inteligjencë artificiale, me synimin për të adresuar sfida si ngadalësimi i rritjes ekonomike dhe plakja e popullsisë. Sipas drejtorit të dyqanit, Wang Yifan, për të sjellë robotët në çdo shtëpi nuk mjafton vetëm puna e kompanive prodhuese. Çmimet variojnë nga $278 deri në disa qindra mijëra dollarë. Vizitorët mund të ndërveprojnë me një gamë të gjerë robotësh, përfshirë qen mekanikë dhe lojtarë shahu.
Dyqani ndodhet pranë një restoranti tematik ku ushqimi gatuhet nga kuzhinierë mekanikë dhe shërbehet nga robotë. Në të ka gjithashtu një seksion për pjesë këmbimi dhe riparime. Kina po e konsideron industrinë e robotikës si prioritet strategjik, me subvencione mbi $20 miliardë në vitin e fundit dhe planet për një fond prej $132 miliardë për startup-e në AI dhe robotikë.
Hapja e Robot Mall përkon me fillimin e Konferencës Botërore të Robotëve në Pekin, me mbi 1,500 ekspozita nga mbi 200 kompani vendase dhe ndërkombëtare. Gjithashtu, Pekini do të presë World Humanoid Robot Games nga 14 deri më 17 gusht, ku ekipe nga mbi 20 vende do të garojnë në disiplina si atletikë, vallëzim dhe futboll.
