Sony po gjendet gjithnjë e më tepër në vështirësi për të prodhuar konsola PlayStation 5 dhe raportimet e fundit nga Bloomberg tregojnë se kompania ka reduktuar parashikimet për prodhimin gjatë vitit aktual financiar. Më parë kompania kishte parashikuar se do të arrinte të prodhonte rreth 16 milionë njësi nga prilli i 2021 deri në mars të 2022, por tashmë ky parashikim është reduktuar me një milionë njësi.
Publikisht Sony kishte parashikuar se do të shiste rreth 14.8 milionë konsola gjatë këtij viti financiar, pra kjo nuk është një ulje shumë e madhe numrit të parashikuar, por tregon thjesht se sa e vështirë është situata për të siguruar proçesorët e duhur për prodhimin e konsolave të reja. Shifra prej 16 milionë njësish do t’i mundësonte kompanisë sigurimin e stokut për vitin e ardhshëm.
Përveç problemeve me sigurimin e komponentëve, Sony po përballet dhe me probleme të logjistikës. Raporti i Bloomberg tregon se furnizimet me komponentë nuk po arrijnë në kohë, dhe nivelet e ndryshme të vaksinimit kanë komplikuar operacionet në bazat e prodhimit.
Sony ka parashikuar se gjatë vitit tjetër financiar që fillon pas prillit të 2022 do të shesë rreth 22.6 milionë PS5, por partnerët e kompanisë besojnë se arritja e këtij qëllimi do të jetë i vështirë.
Me pak fjalë, do të jetë akoma e vështirë që të gjeni një konsolë PS5 për një kohë të gjatë.
