Senati francez ka aprovuar projektligjin e ri i cili do të detyrojë të gjithë hapësirat e mëdha të parkimit në Francë të “mbulohen” nga panelet diellore përgjatë 6 viteve të ardhshme. Pritet që pas përfundimit të instalimit të këtyre paneleve diellore të gjenerohet një sasi e barabartë energjie me 10 reaktorë nuklearë.
Në këtë legjislacion do të përfshihen të gjithë hapësirat e parkimit me më tepër se 80 vende dhe do të jetë i detyruar mbulimi i të paktën gjysmës së hapësirës. Përfitimet nga ky vendim do të jenë të dyfishta: gjenerimi i rreth 11 GW energji të rinovueshme dhe mbrojtja e makinave nga rrezet e diellit.
Lajmi vjen pasi presidenti Emmanuel Macron tha se ai ka si qëllim nxitjen madhore të zhvillimit të sektorit të energjisë së rinovueshme, me planet për të 10 fishuar kapacitetin diellor në 2050.
Projektligji do të hyjë në fuqi në korrik të 2023: hapësirat me 80-400 vende parkimi do të kenë afat 5 vite për të instaluar këto panele diellore, ndërkohë që hapësirat me më tepër se 400 vende do të duhet të mbulojnë gjysmën e hapësirës me panele diellore brenda 3 vitesh.
Kjo strategji duket mjaft e mirë për të zgjidhur një ndër problemet më të mëdha me të cilat po përballen shumë vende, rritjen e çmimit të elektricitetit.
