Japonia është një shtet shumë i varur nga lëndët djegëse, mirëpo një gjë e tillë mund të ndryshojë së shpejti. Në këtë shtet është testuar në mënyrë të suksesshme një sistem turbinash i vendosur në thellësi të oqeanit, i cili mund të ofrojë një formë të qëndrueshme të energjisë së rinovueshme.
Kjo shpikje u bë nga prodhuesi IHI Corp, i cili prej kohësh zhvillon turbina nënujore që gjenerojnë energji nga thellësitë e oqeanit prej më tepër se 10 vitesh. Turbina gjigande nënujore e quajtur Kairyu duket si një aeroplan 330 tonësh. Ai përbëhet nga 2 turbina me kah rrotullues të ndryshëm që janë të zhytura në thellësi 30-50 metra.
Tashmë IHI Corp ka në plan t’i instalojë këto turbina në rrjedhën më të fuqishme në botë, Kuroshio, dhe të transmetojë energjinë përmes kabujve në shtratin e detit. New Energy and Industrial Technology Development Organization spekulon se ky sisitem mund të gjenerojë deri në 200 gigavat energji, e barabartë me 60% të kapacitetit prodhues aktual në Japoni.
“Rrjedhat e oqeaneve kanë një avantazh për sa i përket disponueshmërisë në Japoni” tha Ken Takagi, një profesor në University of Tokyo Graduate School of Frontier Sciences. “Energjia e erës është më e përshtatshme gjeografikisht për terrenin e Evropës, e cila është e ekspozuar ndaj erërave perëndimore dhe ndodhet në lartësi më të mëdha.”
