Kanë kaluar vetëm disa muaj që nga lançimi i Google Pixel 7 dhe 7 Pro, të cilët fuqizohen nga proçesorët Tensor G2. Tashmë raportimet kanë nisur të qarkullojnë se gjenerata e ardhshme e proçesorëve Tensor do të prodhohet nga Samsung.
Tensor G3 ka një emër të koduar Zuma dhe ky raportim tregon se prodhimi i tij në masë do të kryhet nga kompania koreanojugore.
Përveç emrit të koduar dhe prodhuesit, janë publikuar dhe disa detaje të tjera rreth këtij proçesori. Mendohet se Tensor G3 do të jetë tepër i ngjashëm me Exynos 2300, megjithatë detajet e performancës nuk janë bërë të qarta.
Nga ana tjetër, Samsung ka nisur punën prej disa kohësh për prodhimin e Exynos 2300, dhe pse kompania ka vendosur të mos i përdorë më këtë proçesorë në smartphone-t flagship që prodhon. Duket pothuajse e konfirmuar se seria Galaxy S23 do të fuqizohet në mbarë botën nga proçesorët Qualcomm.
Projekti i koduar Zuma mund të përfitojë nga teknologjia e re e prodhimit 3nm të Samsung. Aktualisht, proçesori Tensor G2 është ndërtuar në bazë të teknologjisë 5nm.
