Studiuesit në MIT dhe McMaster University kanë zbuluar një antibiotik, i cili mund të shkatërrojë një lloj bakteri që është shumë rezistent ndaj barnave, duke përdorur një algoritëm të fuqizuar nga inteligjenca artificiale.
Së shpejti ky antibiotik mund të përdoret për të luftuar Acinetobacter baumannii, një bakter i cili shpesh herë gjendet nëpër spitale dhe mund të çojë në pneumoni, meningit apo infeksione të tjera serioze.
“Acinetobacter mund të mbijetojë në dorezat e dyerve apo pajisje spitalore për një periudhë të gjatë kohore, dhe mund të kapë nga ambienti gjene përgjegjëse për rezistencën ndaj antbiotikëve. Është mjaft e zakonshme në ditët e sotme që të gjesh A. baumannii të cilat janë rezistente ndaj pothuajse të gjithë antibiotikëve.” tregon Jonathan Stokes, profesor i biokimisë dhe shkencave biomjekësore në McMaster University.
Studiuesit arritën të gjenin antibiotikun e ri nga 7,000 kombinime potenciale të gjeneruara nga një model machine learning i stërvitur për të llogaritur nëse një përbërje kimike ëshët në gjendje për të parandaluar shumimin e A. baumannii.
Në testimet e para tek minjtë, kombinimi i ri i zbuluar (që u emërtua Abaucin) ishte në gjendje të trajtonte infeksionet e shkaktuara nga A. baumannii, falë selektivitetit që ky antibiotik ka ndaj këtij bakteri.
