Vetëm disa ditë më parë Oppo prezantoi flagship-in Find X5, i cili suporton karikimin e shpejtë 80W. Ditën e djeshme gjatë eventit të MWC, ku Geek Room së bashku me Neptun janë të pranishëm, kompania prezantoi hapin e rradhës në karikimin e shpejtë, një sistem të rifreskuar me pothuajse dyfishin e shpejtësisë.
Në një test laboratorik, karikuesja e shpejtë SuperVOOC 150W karikoi një smartphone prototip me bateri 4,500mAh nga 1% në 50% në vetëm 5 minuta, dhe për të bërë karikimin e plotë u deshën vetëm 15 minuta (gjatë kësaj kohe smartphone-i ishte i ndezur, por me airplane mode të aktivizuar).
Karikuesja e vjetër 65W arrinte ta karikonte këtë smartphone plotësisht për 40 minuta. Për të arritur këto shpejtësi kaq të mëdha karikimi, smartphone-i ka dy qeliza baterie që karikohen në paralel.
Oppo prezantoi gjithashtu Battery Health Engine, e cila vjen me një çip të veçantë në bateri. Në testet laboratorike, bateria ruajti 80% të kapacitetit të saj dhe pas 1,600 ciklesh karikimi. Duhet theksuar se standardi mesatar i industrisë në ditët e sotme është 80% e kapacitetit të baterisë pas vetëm 800 ciklesh karikimi.
E gjitha kjo arrihet falë algoritmit të Smart Battery Health, që monitoron vazhdimisht elektrodat për të minimizuar “vdekjen e litiumit”.
Pajisja e parë që do të përfitojë nga kjo teknologji karikimi do të jetë një OnePlus.
Kompania shfaqi për herë të parë se ka zhvilluar një prototip që bën karikimin e shpejtë 240W.
