OpenAI po prezanton një funksion të ri brenda ChatGPT, të quajtur Pulse, i cili krijon raporte të personalizuara gjatë natës, në mënyrë që përdoruesit të kenë një përmbledhje të gatshme të lajmeve kur të zgjohen. Pulse dërgon 5 deri në 10 “briefs” që përmbledhin lajme, ide apo sugjerime sipas interesave të individit, duke synuar që ChatGPT të bëhet aplikacioni i parë që ju kontrolloni në mëngjes, ashtu si një aplikacion lajmesh ose rrjeti social.
Raportet e Pulse mund të përfshijnë përmbledhje lajmesh për tema specifike – p.sh. rezultatet e një ekipi sportiv – ose sugjerime të personalizuara për aktivitete familjare e udhëtime.
Ky shërbim është pjesë e një strategjie më të gjerë për ta bërë ChatGPT më proaktiv dhe më pak të varur nga pyetjet e menjëhershme. OpenAI po orienton produktet e veta drejt përdorimit asinkron, duke e shndërruar platformën në një asistent të përhershëm. Funksione si ChatGPT Agent dhe Codex janë hapa që shkojnë në këtë drejtim.
Fidji Simo, CEO i ri i aplikacioneve në OpenAI, tha se synimi është “t’u ofrojmë të gjithëve mbështetjen që deri tani vetëm më të pasurit e kanë pasur.” Pulse është hapi i parë në këtë vizion, fillimisht për përdoruesit Pro.
Aktualisht, Pulse ofrohet për abonentët e planit Pro me kosto $200 në muaj dhe shfaqet si një skedë e re në aplikacionin ChatGPT. OpenAI planifikon ta zgjerojë shërbimin tek përdoruesit Plus dhe më pas tek të gjithë, por fillimisht duhet të rrisë kapacitetet kompjuterike dhe të bëjë produktin më efikas. Kompania ka theksuar se kufizimet aktuale të serverëve e detyrojnë ta ofrojë shërbimin vetëm për planin më të shtrenjtë, ndërsa po ndërton qendra të reja të dhënash në bashkëpunim me Oracle dhe SoftBank.
