OpenAI ka prezantuar browser-in e ri të internetit, Atlas, duke synuar të sfidojë dominimin shumëvjeçar të Google në tregun e kërkimit dhe shfletuesve. Gjatë prezantimit, CEO i OpenAI, Sam Altman, e quajti Atlas një “mundësi të rrallë për të rishpikur vetë konceptin e browser”, duke theksuar se ndërfaqja tradicionale me “tabs” ka mbetur pothuajse e pandryshuar për dekada.
Në qendër të Atlas ndodhet ChatGPT, që lejon përdoruesit të ndërveprojnë drejtpërdrejt me faqet e internetit, të kërkojnë produkte, të rezervojnë takime apo të planifikojnë ngjarje përmes bisedës. Në vend të një kutie kërkimi, faqja hyrëse e shfletuesit hap një dritare bisede me ChatGPT, që ndjek përdoruesin në çdo faqe dhe kujton veprimet për të ofruar sugjerime më inteligjente. Me funksionin “agent mode”, Atlas mund të kryejë detyra automatikisht – si gjetja e një dyqani ushqimor, porositja e përbërësve apo planifikimi i ngjarjeve – veçori e disponueshme për përdoruesit Plus, Pro dhe Business.
Altman deklaroi se ndërsa shfletuesit e dikurshëm e hapnin internetin përmes URL-ve dhe kërkimeve, e ardhmja e aksesit online do të vijë përmes përvojës së bisedës. Synimi i OpenAI është që ChatGPT të bëhet “sistemi operativ i epokës së inteligjencës artificiale”, duke shfrytëzuar bazën e saj me mbi 800 milion përdorues javorë. Kompania po zhvillon gjithashtu çipat e saj AI dhe ka siguruar një investim prej $100 miliardë nga Nvidia.
Megjithatë, Google Chrome mbetet një kundërshtar i fuqishëm me 3.45 miliardë përdorues dhe 90% të tregut të kërkimit. Pas vendimit gjyqësor që e shpalli Google fajtor për monopol ilegal, OpenAI dhe Perplexity AI shprehën interes për blerjen e Chrome, por pa sukses. Me Atlas, beteja e re e “luftërave të browser-ave” ka nisur — ndoshta kapitulli i tretë pas epokave të Internet Explorer dhe Chrome.
