OnePlus do të shtojë linjën e produkteve që ofron me një tablet të ri, që pritet të prezantohet gjatë eventit të datës 7 shkurt, së bashku me OnePlus 11 5G dhe Buds Pro 2. Fotografia zyrtare e OnePlus Pad u shfaq nga vetë kompania, nga ku ne mund të vemë re ngjyrën “Halo Green” dhe një kamera me vendosje jo të zakonshme.
Fotografia u publikua nga website zyrtar i kompanisë në Indi. Raportime të ndryshme tregojnë se dizajni i jashtëm do të jetë i ngjashëm me një iPad, me trup alumini dhe kënde paksa të rrumbullakosura. Për sa i përket ngjyrës, OnePlus tregoi për TechRadar se ngjyra jeshile “ndërthur gjallërinë e jetës me pafundësinë e hapësirës”.
Për fat të keq ende nuk janë publikuar shumë informacione në lidhje me ngjyrat e tjera, specifikat e plota si dhe çmimin e kësaj pajisje. Ju mund të shikoni akoma më mirë formën e këtij tableti duke rregulluar nivelet e ndriçimit të fotografisë.
Ky mund të jetë viti i “rilindjes” për tabletët Android, pasi së bashku me tabletin e OnePlus pritet të prezantohet dhe një tablet nga Google, që do të përdorë proçesorin G2. Për momentin tabletët nga Apple, Samsung dhe Amazon dominojnë tregun.
