Shkencëtarët kanë demonstruar për herë të parë përdorimin e një kompjuteri wireless të lidhur me trurin, një përparim masiv për personat e paralizuar.
Kompjuterat tradicionalë të përdorur deri më tani janë të lidhur me kabuj, mirëpo sistemi i ri i quajtur BrainGate, zëvëndëson këto kabuj me një transmetues të vogël që fiksohet mbi kokën e përdoruesit. Njësia më pas lidhet me një grup elektrodash të implantuar në korteksin motor të trurit.
Në një testim klinik, dy pjesëmarrësit e paralizuar përdorën këtë kompjuter për të drejtuar mouse, për të klikuar dhe për të shkruajtur në një tablet. Ata arritën të njejtat shpejtësi dhe saktësi në shtypjen e shkronjave me përdoruesit e kompjuterit me kabuj.
Shkencëtarët thanë se kjo ishte hera e parë që një pajisje ka transmetuar një spektër të plotë sinjalesh të regjistruara nga një sensor në korteksin motor të trurit. Drejtuesi i testimeve të BrainGate, Leigh Hochberg, tha se pjesëmarrësit u lejuan t’i testonin këto pajisje në shtëpinë e tyre për 24 orë, dhe me të dhënat e përfituara ato do të kuptojnë më mirë se si sinjalet neurale evoluojnë me kalimin e kohës.
Pasi të përfitohen të dhëna të mjaftueshme rreth këtyre teknologjive, mund të konsiderohet implantimi i tyre në persona të ndryshëm.
