Nike ka prezantuar projektin e ri eksperimental “Project Amplify”, një sistem atletesh të motorizuara që synon të përmirësojnë shpejtësinë dhe qëndrueshmërinë e vrapuesve. Këto atlete robotike pritet të dalin në treg në vitin 2028. Ideja që qëndron pas tyre është t’u japë një shtytje mekanike përdoruesve gjatë çdo hapi, duke e bërë vrapin më të lehtë dhe më efikas, pa kërkuar shumë stërvitje shtesë.
Sistemi përbëhet nga disa pjesë: një lidhëse elastike që vendoset rreth pulpës së këmbës dhe mban bateritë; një krah mekanik me një motor të vendosur anash kyçit të këmbës si dhe një shinë e lëvizshme e fiksuar në thembër. Kur vrapuesi hedh hapin, motori tërheq thembrën duke shtuar një shtytje të lehtë dhe duke imituar lëvizjen natyrale të kyçit dhe këmbës. Kjo teknologji e jep ndjesinë e një “hapi më të lehtë” dhe ndihmon vrapuesin të ruajë energji.
Nike thekson se sistemi nuk është menduar për atletë elitarë që kërkojnë të thyejnë rekorde, por për vrapues mesatarë. Këto këpucë mund t’i ndihmojnë ata të përmirësojnë qëndrueshmërinë, të vrapojnë më gjatë dhe të ndihen më rehat. Po ashtu janë menduar edhe për ecës të përditshëm ose persona që qëndrojnë për një kohë të gjatë në këmbë.
Projektet e tilla i bashkohen trendit të pajisjeve të asistuara—si ekzoskelete apo pajisje të tjera robotike—që synojnë të mbështesin trupin e njeriut, jo ta zëvendësojnë stërvitjen. Nike po zhvillon Project Amplify në bashkëpunim me kompaninë e robotikës Dephy dhe po teston prototipet në natyrë dhe në laboratorin e inovacionit në Oregon.
