Microsoft lajmëroi ditën e sotme se do të zgjerojë partneritetin me OpenAI, kompaninë mëmë që ka zhvilluar sistemet AI ChatGPT, DALL-E 2 DHE GPT-3, pasi arriti marrëveshjen disa vjeçare që do t’i kushtojë Microsoft disa miliarda dollarë.
OpenAI tregon se sigurimi i fondeve të reja – shuma ekzakte nuk është bërë publike – do të përdoret për të vazhduar kërkimin e pavarur në zhvillimin e një inteligjence artificiale që është “e sigurtë, e dobishme dhe e fuqishme.”
Nëpërmjet një postimi në blog, Microsoft tregoi se do të rrisë investimet për zhvillimin e superkompjuterave të specializuar që do të përshpejtojnë studimet e OpenAI dhe do të integrojnë sistemet AI të OpenAI me produktet e kompanisë. Azure do të vazhdojë të mbetet platforma cloud që OpenAI do të përdorë.
Më parë diskutohej se Microsoft ishte përgatitur të integronte ChatGPT në motorin e kërkimit Bing si dhe të sillte teknologjinë AI të OpenAI në aplikacionet si Word, PowerPoint dhe Outlook. Para pak kohësh Microsoft ka përfshirë GPT-3 dhe DALL-E 2 në shërbimet si Power Apps, Microsoft Edge si dhe në shërbimin që do të vijë së shpejti Designer.
Përpjekjet e Microsoft për të investuar në OpenAI kanë nisur prej vitesh. Në 2019, Microsoft lajmëroi se do të investonte $1 miliardë në OpenAI për të zhvilluar në bashkëpunim me to teknologji për platformën Azure të kompanisë dhe “për të zgjeruar” aftësitë në inteligjencën artificiale të OpenAI.
Një vit më vonë Microsoft prezantoi superkompjuterin që OpenAI zhvilloi nga bashkëpunimi i 2019, ndërkohë që në 2021 u lançua Azure OpenAI Service.
