Meta po eksploron krijimin e një rrjeti të ri social të decentralizuar që mund të shndërrohet në një rival tepër të rëndësishëm të Twitter.
Platformer raporton se projekti me emrin e koduar P92 do të zhvillohet në një aplikacion të veçantë, megjithatë përdoruesit do të mund të regjistrohen në këtë aplikacion duke përdorur kredencialet e tyre në Instagram. Kjo lëvizje mund të tërheqë disa nga përdoruesit e Twitter të cilët kanë mbetur të pakënaqur nga ndryshimet e bëra në Twitter nga Elon Musk.
“Ne po eksplorojmë krijimin e një rrjeti social të decentralizuar ku përdoruesit do të mund të shpërndajnë mendimet e tyre në formatin e teksteve të shkruara,” tregoi një zëdhënës i Meta për CNBC. “Ne besojmë se ekziston një mundësi për të krijuar hapësira të veçanta ku krijuesit dhe figurat publike mund të shpërndajnë informacione rreth interesave të tyre.”
Rrjetet sociale të decentralizuara si Mastodon apo Bluesky, mbështeten në serverat individual të cilët përdorin një protokoll uniform, duke iu shmangur kontrollit të centralizuar të përmbajtjeve si dhe çensurimit të tyre.
Nuk dihet ende se prej sa kohësh Meta po punon për projektin P92, ose në qoftë se ka nisur puna për zhvillimin e kësaj platforme, megjithatë Moneycontrol tregon se kjo ide është ende “një punë në vazhdim”. Meta po mendon gjithashtu që të mundësojë integrimin me rrjete sociale ekzistuese si Twitter apo Mastodon, duke u mbështetur në protokollin e quajtur ActivityPub.
