Mastercard sjell nga sot Apple Pay për mbajtësit e kartave në Shqipëri. Apple Pay është një mënyrë e lehtë, e sigurt dhe private për të paguar në dyqane, në aplikacione dhe online.
Për të paguar në dyqane, klientët thjesht duhet të klikojnë dy herë butonin anësor, të verifikohen dhe të afrojnë iPhone-in ose Apple Watch-in pranë një terminali pagesash për të kryer pagesën pa kontakt. Çdo pagesë me Apple Pay është e sigurt, pasi verifikohet përmes Face ID ose Touch ID, si dhe me një kod sigurie unik njëpërdorimësh. Apple Pay pranohet në supermarkete, farmaci, restorante, kafene, dyqane dhe shumë vende të tjera që pranojnë pagesa pa kontakt.
Jemi krenarë që jemi banka e parë në Shqipëri që sjell Apple Pay për qytetarët shqiptarë duke shënuar një tjetër moment kyç në transformimin digjital të ProCredit Bank dhe në angazhimin tonë të vazhdueshëm për të qenë udhëheqës në prezantimin e shërbimeve bankare inovative në tregun shqiptar. Ky moment i rëndësishëm pasqyron premtimin tonë për të udhëhequr inovacionin në sektorin bankar shqiptar, gjithmonë duke vendosur klientët tanë në qendër. Misioni ynë është të ofrojmë zgjidhje pagese dixhitale të sigurta, të shpejta dhe të përshtatshme, në përputhje me pritshmëritë në zhvillim të klientëve tanë. Me Apple Pay, jo vetëm që po përqafojmë inovacionin, por po konfirmojmë sërish angazhimin tonë për të ofruar një përvojë moderne bankare të ndërtuar mbi siguri, thjeshtësi dhe teknologji të avancuar.
Mirsad Haliti, Drejtor Ekzekutiv i ProCredit Bank Shqipëri.
Klientët mund të përdorin gjithashtu Apple Pay për të kryer blerje më të shpejta dhe më të përshtatshme në aplikacione ose në ueb, pa pasur nevojë të krijojnë llogari apo të shkruajnë vazhdimisht të dhënat, informacionin e kartës apo adresat e dërgesës dhe faturimit.
Siguria dhe privatësia janë në thelb të Apple Pay
Kur klientët përdorin një kartë krediti ose debiti me Apple Pay, numrat aktualë të kartës nuk ruhen as në pajisje dhe as në serverët e Apple. Në vend të tyre, caktohet një Numër i Llogarisë së Pajisjes (Device Account Number) unik, i cili ruhet në mënyrë të sigurt në Elementin e Sigurt (Secure Element), një çip i certifikuar dhe i standardizuar në industrinë e pagesave, i dizajnuar për të ruajtur të dhënat e pagesës në mënyrë të sigurt.
