Një lloj i ri leukoplastesh smart, i zhvilluar nga shkencëtarët në University of Bologna në Itali, është i pajisur me një sensor që lexon nivelet e lagështisë (faktor tepër i rëndësishëm që tregon se kur plaga është shëruar) dhe ia transmeton këto të dhëna aplikacionit që ndodhet në një smartphone pranë.
Ky informacion do të bëjë të mundur që doktorët të kuptojnë se një plagë është duke u shëruar pa e hequr leukoplastin, veprim ky që pengon proçesin e shërimit. Duke dhënë informacione në kohë reale rreth niveleve të lagështisë, doktorët do të monitorojnë më mirë plagët e pacientëve.
Studiuesit nuk kanë publikuar ende një kosto ekzakte për këtë leukoplast smart dhe as datën se kur ai do të prezantohet zyrtarisht, pasi për momentin gjithçka është ende në fazë eksperimentale. Ato u siguruan që të theksonin se gjithçka do të realizohet me kosto të ulëta.
“Ne zhvilluam një numër leukoplastësh me shtresa të ndryshme dhe me karakteristika të ndryshme absorbimi.” tha autori i këtij studimi, Dr Luca Possanzini. “Idea është që çdo lloj plage do të ketë një veshje të caktuar, që nga plagët me madhësi të vogëla dhe deri tek ato me madhësi të mëdha. Megjithatë ne do të na duhet që të optimizojmë më tepër sensorin dhe të sigurojmë vlerat e sakta për shërimin optimal para se të aplikojmë këtë teknologji në leukoplastet.”
