Koreanojugorët së shpejti do të kenë mundësinë të përdorin identifikimin dixhital të mbështetur në blockchain në vend të kartave fizike duke nisur nga viti 2024, në një periudhë ku shteti mbështet gjithnjë e më tepër teknologjinë blockchain.
Sipas një raportimi nga Bloomberg tregohet se qeveria ka në plan të shpërndajë kartat dixhitale përmes një aplikacioni që do të përdoret nga smartphone-t në të ardhmen. Në vitin 2024 do të bëhet lançimi për rreth 45 milionë qytetarë që janë të gatshëm të përshtaten me këtë teknologji brenda 2 viteve të para.
Ekonomisti Hwang Seogwon tha se kartat dixhitale të identifikimit do të përdoren për shërbimet financiare, shëndetësore, taksat dhe transportimin, ndërkohë që drejtuesi i Byrosë Dixhitale të qeverisë Suh Bo Ram tha se kjo teknologji do të ndihmojë bizneset që nuk kanë arritur të bëjnë tranzicionin drejt botës virtuale.
Nëpërmjet këtij plani qeveria do të pranojë aplikimin e një sistemi të decentralizuar identifikimi, gjë që nënkupton se qeveria nuk do të ketë akses në informacionet e regjistruara në smartphone, duke përfshirë dhe përdorimin e ID dixhitale, ku dhe si janë përdorur.
Në gusht të vitit 2020, mbi 1 milionë koreano-jugorë kishin implementuar sistemin e mbështetur në blockchain për patentat e automjeteve, i cili aksesohet përmes aplikacionit PASS në Korenë e Jugut.
