Një inovacion i ri në fushën e ruajtjes së të dhënave po vjen nga Kina: Mini SSD, një format i ri që kombinon përmasat ultra të vogla të një karte MicroSD me shpejtësinë e lartë të një disku M.2. Prodhuar nga kompania Biwin, kjo pajisje vjen në përmasat 15mm x 17mm x 1.4mm, pra më e vogël se një monedhë amerikane dhe pak më e madhe se një kartë MicroSD, por arrin shpejtësi leximi deri në 3,700 MB/s dhe shkrimi deri në 3,400 MB/s, falë lidhjes PCIe 4×2. Kapacitetet variojnë nga 512GB deri në 2TB, duke e bërë atë një alternativë shumë të fuqishme.
Krahasuar me standardet aktuale, diferenca është e dukshme: MicroSD Express arrin deri në 985MB/s, më pak se një e treta e shpejtësisë së Mini SSD. Ndërsa kartat SD Express mund të shkojnë teorikisht deri në 3,940MB/s, ato janë gati dy herë më të mëdha në përmasa. Në të njëjtën kohë, Mini SSD ruan një praktikë të ngjashme me kartat SIM të telefonave: përdor një hapësirë të dedikuar që hiqet me një gjilpërë.
Biwin e sheh këtë teknologji të përshtatshme për laptopë, tableta, telefona, kamera dhe pajisje të tjera portative. Pajisja ofron gjithashtu rezistencë IP68 ndaj ujit dhe pluhurit si dhe rezistencë ndaj rënieve deri në 3 metra, çka e bën të dobishme sidomos për smartphone.
Teknologjia tashmë po zbatohet në dy pajisje të avancuara kineze: GPD Win 5, një handheld gaming i fuqishëm, dhe OneXPlayer Super X nga OneNetbook, një laptop/tablet hibrid me çip Strix Halo. Të dy modelet prezantuan hapësirën e re për Mini SSD gjatë panairit ChinaJoy.
Megjithëse është ende e paqartë nëse kjo formë do të bëhet një standard global dhe nuk ka ende informacione mbi çmimin apo shpërndarjen e saj, Mini SSD premton të jetë një hap i madh në drejtim të ruajtjes së shpejtë, të qëndrueshme dhe ultra-kompakte të të dhënave.
