Kina mund të kufizojë përdorimin e smartphone-ve nga fëmijët dhe adoleshentët vetëm në një orë në ditë, sipas rregullave të propozuara nga rregullatori i hapësirës kibernetike të vendit.
Administrata e Hapësirës Kibernetike të Kinës njoftoi udhëzime që mund të aplikohen së shpejti që përfshijnë kufizime me qëllim parandalimin e “problemit të varësisë nga interneti të të miturve“. Asnjë person kinez nën 18 vjeç nuk do të lejohet të përdorë një smartphone për më shumë se dy orë në ditë nëse ky draft miratohet. Dhe të gjithë persona më të mëdhenj se tetë vjeç, por më të rinj se 16 vjeç do të mund të përdorin smartphone-t vetëm një orë në ditë, ndërsa fëmijët nën tetë vjeç do të lejohen vetëm 40 minuta në ditë.
Rregullatori po propozon që të gjithë telefonat inteligjentë të vijnë me një “modalitet për minorenët” lehtësisht të aksesueshëm për të zbatuar kufizimet. Kjo do të parandalonte gjithashtu fëmijët që të përdorin telefonat e tyre midis orës 22:00 dhe orës 6 të mëngjesit, me përjashtim të produkteve arsimore dhe shërbimeve emergjente. Ky propozim përfshin udhëzime për “grupime ekskluzive të përmbajtjes” në grupmosha të ndryshme.
Për fëmijët nën tre vjeç, rekomandohet që t’u shfaqen këngë dhe përmbajtje të tjera të përqendruara në audio. Prindërit do të lejohen të menaxhojnë atë që shohin fëmijët e tyre, si dhe aftësinë për të bllokuar ose ndjekur përdorues të caktuar në aplikacionet e mediave sociale. Nëse rregullat zbatohen, mund të kenë një ndikim të madh në kompanitë kineze të aplikacioneve si Tencent dhe ByteDance. Në vitin 2021, Kina vendosi kufizime të rrepta kohore për videolojërat për fëmijët, gjë që i kufizoi ata të luanin tre orë në javë. Dhe më pas, gjatë një pushimi dimëror katër-javor, Tencent tha se fëmijët e shkollave fillore mund të përdornin platformën e saj të lojërave vetëm për një total prej 14 orësh. Rregullat e propozuara të CAC janë aktualisht të hapura për konsultim publik.
