Nothing ka prezantuar kufjet e reja premium Ear 3, me çmim $179, të menduara për t’u kombinuar me Phone 3. Dizajni i përmirësuar sjell detaje alumini si në kufje ashtu edhe në kuti, ndërsa këndi i ri i stemit dhe ventilimi i brendshëm rrisin ndjeshmërinë e sinjalit me 20% dhe ofrojnë rehati më të madhe në vesh. Këllëfi kombinon alumin të ricikluar dhe plastikë me proces nano-injeksioni, pa ngjitës, duke e bërë strukturën më të fortë, edhe pse më të vështirë për riparim.
Risia kryesore është “Super Mic”, një mikrofon shtesë i vendosur në kutinë e karikimit, i konceptuar si një “walkie-talkie” futuristik për zë më të qartë. Duke përdorur beamforming, ai fokuson zërin dhe zvogëlon zhurmat përreth, duke e bërë më të lejtë përdorimin në thirrje në Zoom, Teams, Google Meet, WhatsApp dhe WeChat, si dhe për regjistrime në aplikacionet Voice Memos (iOS/Android) dhe Blackmagic. Megjithatë, nuk mund të zëvendësojë mikrofonin e paracaktuar në aplikacione si Messages apo video të tjera, kufizim që Nothing nuk mund ta kapërcejë.
Secila kufje ka tre mikrofona dhe një njësi “bone conduction” për regjistrim më të saktë të audios, duke reduktuar ndikimin e erës. Noise cancellation premton mbi 25 dB ulje të zhurmave, por testet tregojnë izolim më të dobët krahasuar me konkurrentët si Pixel Buds Pro 2 apo AirPods Pro 2. Nga ana tjetër, cilësia e tingullit është përmirësuar dukshëm: bas më i fuqishëm dhe treble më i pastër falë ridizënjimit të altoparlantit 12 mm. Aplikacioni Nothing X lejon rregullime të personalizuara dhe integron veçori AI që kërkojnë një Nothing Phone, si transkriptim automatik dhe aktivizim të ChatGPT me një gjest “double pinch”.
Jetëgjatësia e baterisë është rritur: rreth 5.5 orë dëgjim me ANC dhe 22 orë shtesë nga kutia. Karikimi 5-minutësh ofron deri një orë riprodhim pa ANC. Ear 3 do të vijë në ngjyrë të bardhë dhe të zezë më 25 shtator, me porositë që janë hapur tashmë.
