Kompanitë si SpaceX, Blue Origin dhe OneWeb po lançojnë në qiell megakonstelacione satelitësh për të ofruar akses në internet për përdoruesit, mirëpo disa grupe indigjenësh besojnë se këto iniciativa po largojnë traditat kulturore.
Ndotja e madhe nga ndriçimi së shpejti do të bëjë të padukshëm Rrugën e Qumështit për shumë njerëz, sidomos për ato indigjenë, të cilët kanë tradita tepër të vjetra që mbështeten në shikimin e yjeve. Sipas një studimi në 2020, ndotja nga ndriçimi shihet si një formë e “gjenocidit kulturor”, duke shkatërruar mundësinë e komuniteteve që të shikojnë yjet.
“Shumë tradita dhe sisteme njohjeje në të gjithë botën janë të bazuara tek yjet, dhe aftësia e njerëzve për të shikuar dhe interpretuar pozicionet e tyre ka një rëndësi të madhe në jetën e tyre të përditshme dhe në ruajtjen e këtyre kulturave.” shkruan autori i këtij studimi. “Pengimi i mbikëqyrjes së qiellit të natës pengon lidhjen e indigjenëve me yjet, duke funksionuar kështu si një ‘gjenocid kulturor dhe ekologjik.”
Deri në muajin gusht, SpaceX ka lançuar më tepër se 1,700 satelitë Starlink në hapësirë, mirëpo kompania ka plane shumë më të mëdha në krahasim me gjendjen aktuale. Elon Musk tha se shërbimi mund të ketë mbi 500,000 përdorues deri në gjysmën e vitit 2022.
Sipas The Verge, në orbitën e Tokës mund të ketë mbi 100,000 satelitë operues deri në 2030, ose 25 herë më shumë se aktualisht.
