Një kompani turizmi hapësinor thotë se do të ofrojë fluturimin në stratosferë me një balonë, duke filluar nga 2024, mirëpo një vend në këtë balonë do t’ju kushtojë rreth $50,000. World View Enterprises po punon për krijimin e sistemit të bazuar në balonat në Arizona, nga ku njerëzit do të ngrihen në lartësinë 29 kilometra mbi nivelin e detit.
Kjo lartësi është shumë larg lartësisë prej 80.4 kilometrash që NASA e konsideron fillimin e hapësirës, mirëpo World View thotë se pasagjerët e saj do të shohin skajet e rrumbullakosura të Tokës dhe errësirën e hapësirës.
Këto fluturime pritet të zgjasin rreth 8 orë, mirëpo ato planifikojnë gjithashtu të ofrojnë një aventurë 5 ditore gjatë së cilës pasagjerët do të fluturojnë mbi vendet historike. Kompania thotë se çdo vend i përzgjedhur do të jetë një vend me bukuri natyrore ose me rëndësi historike, duke përfshirë këtu Great Barrier Reef, piramidat e Gizës dhe vende të tjera.
Secila nga kapsulat do të ketë një kapacitet prej 8 pasagjerësh dhe do të ofrojë një udhëtim të butë dhe të qetë. Ndryshe nga kompanitë e tjera të turizmit hapësinor si Virgin Galactic apo Blue Origin, World View tregon se ky fluturim është i përshtatshëm për të gjitha moshat.
“Ne po ri-përkufizojmë turizmin hapësinor për personat që do të shpenzojnë disa orë në kapsulë, duke krijuar kujtime rreth disa nga mrekullive madhështore të Tokës.” tha CEO Ryan Hartman.
