Disa studiues nga Korea e Jugut thonë se duke u inspiruar nga biologjia natyrale, kanë arritur të zhvillojnë një material të ngjashëm me lëkurën e kameleonëve, i cili mund të përshatet menjëherë me ngjyrën e ambientit rrethues.
Ky ekip, i drejtuar nga Ko Seung-hwan, një profesor në Seoul National University, e krijoi këtë lëkurë me një bojë speciale që ndryshon në bazë të temperaturës dhe është e kontrolluar nga disa ngrohës të vegjël dhe fleksibël.
“Ndryshimi i ngjyrës dhe i paternave në mënyrë të vazhdueshme duke u përshtatur me ambientin ku ndodhemi është çelësi i teknologjisë së kamuflazhit që ne kemi krijuar.” tha Ko.
Ekipi demonstroi se teknologjia e bojës me kristale termokromike likide bashkë me ngrohësit me fije të holla argjendi arrijnë të bëjnë të mundur ndërrimin e ngjyrës së lëkurës. Për të kuptuar ngjyrën e ambientit rrethues, kameleoni artificial përdor një robot të pajisur me sensorë.
Në videon e mësipërme shihet qartë se si kameleoni artificial e përshtati ngjyrën e tij kur kaloi në sfondet me ngjyrë të kuqe, blu dhe jeshile.
“Informacioni rreth ngjyrës kapet nga sensorët dhe transmetohet drejt një mikroproçesori dhe më pas drejt fijeve ngrohëse prej argjendi. Kur këto ngrohës arrijnë një temperaturë të caktuar, shtresa e kristalit termokromik likid ndryshon ngjyrën e saj. Kjo teknologji mund të përdoret në të ardhmen në krijimin e uniformave për ushtrinë, në pjesët e jashtme të makinave ose në teknologjinë e ekraneve.” tha Ko.
