Projektet e novacionit dhe teknologjisë në Piramidën e Tiranës po shtohen nga ditë në ditë, duke plotësuar kështu misionin e kësaj hapësire të transformuar tëkryeqytetit. Me siguri mund të keni parë këto ditë nërrjetet sociale apo në rrugë posterat për qendrën Innovation Hub, një qendër teknologjie dhe novacioni te Piramida e Tiranës, e cila do të jetë një HUBitat “speciesh” të larmishme, që nga “shpendët shtegtarë”, pra nomadët digjitalë aventurier, deri te “bishat” eguximshme të sipërmarrjes.
Ky projekt i Fondacionit Shqiptaro-Amerikan për Zhvillim (AADF) ka për qëllim mbështetjen e sektorit privat të Shqipërisë, veçanërisht atyre në teknologji dhe novacion, si dhe fuqizimin e mjedisit sipërmarrës në vend.
Innovation Hub përbëhet nga dy komponentë kryesorë:
Hapësira “Coworking”
Një mjedis modern i dedikuar për hapësira të përbashkëta pune, me një hapësirë mbi 1000 m2 e cila përfshin 87 poste pune, 17 zyra private me kapacitet 1-4 persona, një sallë konferencash/workshop-esh, e pajisur me të gjitha facilitetet e nevojshme për të organizuar një event të suksesshëm.
Kjo hapësirë synon të nxisë novacionin dhe krijimin e një ekosistemi bashkëpunues për sipërmarrësit, startup-et, entuziastët e teknologjisë dhe nomadët digjitalë.
Programi i Akselerimit Plug and Play
Programi i Akselerimit Plug and Play do t’iu ofrojë startup-eve shqiptare jo vetëm kapital, por edhe mentorë biznesi të nivelit botëror, mundësi rrjetëzimi dhe akses në tregjet globale. Ky program synon të fuqizojë 20 startup-e, duke u ofruar mentorim nga ekspertë të Silicon Valley, ekspozim në tregjet ndërkombëtare dhe mundësi investimi. Ky program akselerimi synon të transformojë të ardhmen e teknologjisë në Shqipëri, duke nxitur ide të reja e duke forcuar ekosistemin vendas të sipërmarrjes.
Hub-i do të ofrojë një gamë të gjerë aktivitetesh dhe programesh të drejtuara nga komuniteti për të promovuar bashkëpunimin, inovacionin dhe rritjen. Këto do të përfshijnë evente networking dhe “pitch”, sesione intensive mentorimi, hackathon-e, sfida inovacioni dhe workshop-e gjithëpërfshirëse të fokusuara në sipërmarrje dhe zhvillimin e aftësive.
Start up-et, bizneset dhe nomadët digjitalë mund të sigurojnë një vend në këtë habitat që po lulëzon në zemër të Tiranës përkundrejt tarifave shumë konkurruese, duke konsideruar përfitimet dhe ekspozimin ndaj mundësive të pafundme. A je gati të bëhesh banor i habitatit më cool dhe frymëzues të kryeqytetit e të zbulosh se cila “specie” je në këtë habitat?
