Gjatë panairit IFA 2025 në Berlin, ku Geek Room do të jetë i pranishëm së bashku me Neptun për të informuar ndjekësit rreth të rejave më të fundit nga bota e teknologjisë, kompania kineze Dangbei do të prezantojë jo vetëm projektorin e saj më të ri S7 Ultra Max, por edhe një surprizë të pazakontë: një akuarium inteligjent të quajtur Fish Tank 1 Ultra. Kjo risi shënon hyrjen e markës në një fushë krejt të re, duke e kombinuar teknologjinë me botën ujore nën moton “AI Meets Aquatic Elegance”.
S7 Ultra Max pritet të tërheqë vëmendje falë sistemit të parë të ftohjes me lëng dhe burimit të dritës triple laser me ndriçim të lartë, i cili më në fund mund të vijë me specifikim ANSI lumen. Por, sipas kompanisë, vëmendjen më të madhe mund ta marrë akuariumi i ri, një produkt që synon të rishkruajë përvojën e rritjes së peshqve në shtëpi.
Fish Tank 1 Ultra është pajisur me inteligjencë artificiale që monitoron cilësinë e ujit në kohë reale dhe rregullon automatikisht temperaturën. Për më tepër, ai ka funksion të integruar për ushqimin automatik të peshqve, duke lehtësuar mirëmbajtjen e përditshme. Pajisja vjen me dy pompa ajri dhe sistem dyfishtë filtrimi qarkullues, që garantojnë kushte optimale për gjallesat akuatike.
Një element dallues është ndriçimi i brendshëm “studio-grade”, i cili ofron një spektrin e plotë të ngjyrave. Kjo nuk shërben vetëm për estetikë, por edhe për shëndetin e ekosistemit brenda akuariumit, duke krijuar një ambient më natyral për peshqit dhe bimët ujore.
Nga deklarata zyrtare e Dangbei theksohet se ky produkt është konceptuar jo vetëm si një pajisje zbavitëse, por si një akuarium inteligjent i gjeneratës së ardhshme, që kombinon kujdesin automatik me një eksperiencë vizuale premium për pronarët.
Produkti do të prezantohet zyrtarisht nga 5 deri më 9 shtator 2025 në Booth H21-127 në Messe Berlin, së bashku me produktet e tjera të markës si DBOX02 Pro, Freedo, N2 Mini dhe MP1 Max (tashmë i disponueshëm në Amazon për $1,599).
