Një njoftim i brendshëm nga zëvëndës presidenti i Metaverse në Meta, i cili i drejtohet punonjësve të sektorit AR, shfaq shqetësimet e tij se ka shumë probleme me cilësinë dhe performancën e Horizon Worlds të cilat po bëjnë që shërbimi të mos përdoret as nga vetë punonjësit.
Zëvëndës presidenti Vishal Shah i tregon ekipit se do të jenë në një “izolim kualitativ” për pjesën e mbetur të vitit deri sa problemet në Horizon Worlds të zgjidhen para se produkti të arrijë pranë përdoruesve. “E vërteta e thjeshtë është, nëse ne nuk e pëlqejmë këtë aplikacion që kemi krijuar, si mund të presim që përdoruesit tanë ta pëlqejnë këtë aplikacion?”
Nga këto njoftime ne mund të kuptojmë se fati nuk duket të jetë në anën e Mark Zuckerberg, i cili vuri një bast të madh me zhvillimin e metaverse. Fokusimi në përmirësimin e produktit ekzistues në vend të prezantimit të shërbimeve të reja vjen në një periudhë tepër të keqe për kompaninë, pasi biznesi i reklamave nuk është më aq fitimprurës sa më parë.
Horizon Worlds u publikua në Quest headset gjatë dhjetorit të kaluar dhe pritet që së shpejti të vijë përmes një aplikacioni në smartphone dhe në web për desktop. Në këtë aplikacion njerëzit kanë mundësinë të krijojnë avatar-in e tyre dhe të takohen me miq të rinj në botën virtuale.
